2017 წ. 4 სექტემბერს დაავადებათა კონტროლისა და საზოგადოებრივი ჯანმრთელობის ეროვნული ცენტრში გაიმართა სამუშაო შეხვედრა, რომელზეც წარმოდგენილ იქნა პროექტის „მიკრონუტრიენტთა დეფიციტის ზედამხედველობის გაძლიერება  საქართველოში“ მიმდინარე შედეგები. ცენტრის ხელმძღვანელობის, პროექტის მენეჯერის, მოწვეული პედიატრებისა და საერთაშორისო ორგანიზაციების წარმომადგენლების ერთობლივი დისკუსიების შედეგად გაზიარებულ იქნა კონსულტაციები მომავალში შესაბამისი ინტერვენციების გასატარებლად.

აღნიშნული პროექტი დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ ხორციელდება 2015 წლიდან აშშ დაავადებათა კონტროლისა და პრევენციის ცენტრების (CDC) ფინანსური და ტექნიკური მხარდაჭერით. პროექტის  მიზანს წარმოადგენს მიკრონუტრიენტთა დეფიციტის შესახებ საბაზისო ინფორმაციის მოპოვება და ზედამხედველობის ეფექტური სისტემის ფორმირება.

აღნიშნული პროექტი ატარებს პილოტურ ხასიათს და ხორციელდება მიკრონუტრიენტთა დეფიციტის არსებული მდგომარეობის შესწავლისა და სენტინელური (საყრდენი ბაზის) მიდგომის გამოყენებით. მიკრონუტრიენტთა დეფიციტის ძირითადი მახასიათებლების, გეოგრაფიული, სოციალური, ეთნიკური, აგრეთვე მალნუტრიციის და კვებითი ჩვევების შესახებ არსებული მონაცემების გათვალისწინებით კვლევისთვის შერჩეულია 4 რეგიონი (თბილისი, კახეთი, აჭარა, სამეგრელო). სამიზნე ჯგუფებს წარმოადგენენ ბავშვები (ასაკი 12-24 თვე; 12-13 წელი) და ორსულები. სამიზნე ჯგუფების გამოკვლევა ხდება ნუტრიციოლოგიურ ინდიკატორებზე (რკინა, იოდი, ფოლიუმი). მიღებული შედეგები და გამოცდილება განსაზღვრავს სისტემის შემდგომი განვითარების ძირითად მიმართულებებს.