გაეროს კონვენციის შესაბამისობის და გამჭვირვალობის კოლეგიალური სავარჯიშოში 2 დღის განმავლობაში მონაწილეობას მიიღებს 23 დელეგატი 17 ქვეყნიდან, ასევე ევროკავშირის, გაეროს კონვენციის განხორციელების მხარდამჭერი განყოფილების და სამოქალაქო საზოგადოების თითო წარმომადგენელი (მ.შ. უმრავლესობა დარგის ექსპერტი და ნაწილი დიპლომატიური გამოცდილებით).

საქართველო მიერთებულია გაეროს ბიოლოგიური და ტოქსიკური იარაღის აკრძალვის კონვენციას (BWC) 1996 წლის 22 მაისიდან, და მას შემდეგ მუდმივად მონაწილეობს დიპლომატიურ და ექსპერტთა ყოველწლიურ შეხვედრებში/კონფერენციებში. როგორც კონვენციის წევრი სახელმწიფო, საქართველო ანგარიშვალდებულია BWC კონვენციის მოთხოვნებისა და ვალდებულებების ფარგლებში წარადგინოს ნდობის განმტკიცების შესაბამისობის ფორმა (CBM), რომელიც ითვალისწინებს წევრი სახელმწიფოების მიერ ბიოლოგიური მიმართულებით ქვეყნის შესაძლებლობებისა და საქმიანობის შესახებ სრული ინფორმაციის მიწოდებას ყოველწლიურად.

2011 წელს, კონვენციის მე-7 კონფერენციაზე შემუშავდა ახალი ინსტრუმენტი - „კოლეგიალური სავარჯიშო“ (Peer Review Exercise) ბიოლოგიური საქმიანობის გამჭვირვალობის უზრუნველყოფის მიზნით. აღნიშნული ინსტრუმენტი ნებაყოფლობითი ხასიათისაა და ნებისმიერი წევრი-ქვეყანის ინიციატივა ამ ტიპის ღონისძიების ჩატარებაზე, კიდევ ერთი დასტურია იმისა, რომ ეს ქვეყანა კონვენციით აღიარებულ ვალდებულებებს განუხრელად ასრულებს და მისი საქმიანობა სრულად გამჭვირვალეა მსოფლიო თანამეგობრობისათვის.

გერმანიის ფედერაციულმა რესპუბლიკამ 2016 წელს, და შემდეგ, მაროკოს სამეფომ 2017 წელს, ჩაატარეს გამჭვირვალობის სავარჯიშო. საქართველომ 2018 წლის აგვისტოს BWC ექსპერტთა შეხვედრაზე ოფიციალურად განაცხადა მზაობა, უმასპინძლოს გაეროს წევრი სახელმწიფოების წარმომადგენლებს დაავადებათა კონტროლისა და საზოგადოებრივი ჯანმრთელობის ეროვნული ცენტრის ლუგარის ლაბორატორიაში.